जळगाव जिल्ह्यात वीज कोसळून ५ ठार

0

जळगाव: गेल्या काही दिवसापासून राज्यात पावसाचा जोर वाढला आहे. अनेक ठिकाणी नदी, नाले, दुथडी भरून वाहू लागले आहेत. बुधवारी रात्री पुण्यात १२ लोक पाण्यात वाहून गेल्याची घटना ताजी असताना आज जळगाव जिल्ह्यातील धरणगाव तालुक्यातील भवरखेडा या गावात वीज कोसळून ५ लोकांचा मृत्यू झाला आहे. ज्वारी कापणीचे काम करत असताना शेतात अंगावर वीज पडून पाच जण ठार झाले आहे. या घटनेत ठार झालेले चार जण एकाच कुटुंबातील आहेत. अन्य एका रोजंदारीवर काम करणाऱ्या महिलेचाही यात मृत्यू झाला.

रघुनाथ दशरथ पाटील (वय ५०), त्यांची पत्नी अलका रघुनाथ पाटील (वय ४५), मोठी सून शोभा भागवत पाटील (वय ३३), लहान सून लता उदय पाटील (वय ३०) आणि कल्पना भैय्या पाटील (वय ३५ सर्व रा. भवरखेडा, ता. धरणगाव) अशी या घटनेत ठार झालेल्यांची नावे आहेत.

रघुनाथ पाटील यांच्या शेतात आज ज्वारी कापणीचे काम सुरू होते. सर्व जण काम करत असताना दुपारी अचानक ढगांच्या गडगडाटासह पावसाला सुरुवात झाली. त्यावेळी सर्व जण एका झाडाच्या खाली उभे होते. त्यांच्या अंगावर अचानक वीज कोसळली. या घटनेत सर्वांचा जागीच मृत्यू झाला. या घटनेमुळे भवरखेडा गावावर शोककळा पसरली आहे. घटनेची माहिती मिळताच धरणगाव पोलीस व महसूल यंत्रणेने घटनास्थळी धाव घेतली.

Copy