विजयी चौकार मारण्यासाठी मुंबई सज्ज !

0

मुंबई: आज आयपीएलमध्ये शनिवारी राजस्थान रॉयल्स विरुद्ध मुंबई असा सामना रंगणार आहे. मागील काही सामन्यांत राजस्थानला पराभवाचा सामना करावा लागला आहे. तर, मुंबईने सलग तीन विजय मिळवले. आजचा सामना जिंकून विजयाचा चौकार मारण्यास मुंबई सज्ज आहे.

आयपीएलमध्ये दोन्ही संघ तुल्यबळ समजले जातात. मुंबईने राजस्थानविरुद्ध १० सामने जिंकले असून राजस्थानने मुंबईविरुद्ध आठ सामन्यात विजय मिळवला आहे. यंदा मोसमात, मुंबईची सुरुवात अडखळती झाली. मात्र, मागील तीन सामन्यात मुंबईने आपली कामगिरी उंचावत विजय मिळवला आहे. तर, दुसरीकडे ऐन मोक्याच्या क्षणी कच खाल्याने राजस्थान संघाला सामने गमवावे लागले आहेत. त्यामुळे हातातोंडाशी आलेल्या विजयाला त्यांना मुकावे लागले आहे. राजस्थानने सहापैकी पाच सामने गमावले आहेत. दुसरीकडे मुंबई इंडियन्सचा संघ पुन्हा लयीत येत असल्याचे चित्र आहे.

पोलार्डने मागील सामन्यात दमदार फलंदाजी करत संघाला विजय मिळवून दिला. रोहित शर्मा मागील सामन्यात खेळला नव्हता. मात्र, राजस्थानविरुद्धच्या सामन्यात रोहित खेळण्याची शक्यता आहे. रोहितही संघात आल्यास फलंदाजीची फळी आणखी भक्कम होईल. मुंबईच्या फलंदाजीचा क्रमही दमदार असून मोठी धावसंख्या उभारण्याची आणि धावसंख्येचा पाठलाग करण्याची क्षमता आहे. पोलार्डचा फॉर्म याही सामन्यात कायम राहिला तर राजस्थानसाठी मोठी अडचण होईल. तर, दुसरीकडे राजस्थानकडे चांगले फलंदाज आहेत. बटलर, संजू सॅमसन, रहाणे, स्टिव्ह स्मिथसारखे फलंदाज आहेत. मात्र, बटलर आणि सॅमसनला वगळता अन्य फलंदाजांना अजूनही आपला फॉर्म गवसला नाही. तर, गोलंदाजीदेखील कमकुवत असल्याचे चित्र आहे. त्यामुळे आजचा सामना जिंकण्यासाठी राजस्थानला मोठी कामगिरी करावी लागणार आहे.

Copy