नितीश कुमारांना झटका; त्यांच्या पक्षातील मंत्र्याचा ‘राजद’मध्ये प्रवेश

0

पाटणा: बिहार विधानसभा निवडणुक यावर्षी होणार आहे. तत्पूर्वी राजकारण तापले आहे. आयाराम-गयाराम सुरु झाले आहे, याची सुरुवात सत्ताधारी नितीश कुमार यांच्या पक्षातून झाली आहे. पहिला झटका मुख्यमंत्री नितीश कुमार यांच्या संयुक्त जनता दल (जदयू) पक्षाला बसला आहे. जदयूचे नेते आणि मंत्रिमंडळात उद्योगमंत्री असलेले श्याम रजक यांची जदयूतून हकालपट्टी करण्यात आली असून, त्यांनी आमदारकीचाही राजीनामा दिला आहे. रजक हे आज १७ रोजी लालू प्रसाद यादव यांच्या राष्ट्रीय जनता दलात प्रवेश करणार असल्याचे निश्चित झाले आहे.

बिहार विधानसभा निवडणुकीच्या तोंडावर जदयू नेते श्याम रजक पक्ष सोडणार असल्याची चर्चा राजकीय वर्तुळात सुरू होती. आज (१७ ऑगस्ट) मंत्रिपदाचा राजीनामा देऊन राजदमध्ये प्रवेश करणार असल्याच्या चर्चेनंतर मुख्यमंत्री नितीश कुमार यांनी रजक यांना एक दिवस आधीच मंत्रिमंडळातून बाहेरचा रस्ता दाखवला. नितीश कुमार यांच्या प्रस्ताव राज्यपालांनी मंजूर केला. त्यानंतर रजक यांनी आज आमदारकीचाही राजीनामा दिला.

दरम्यान, राजदचे नेते तेजस्वी यादव आज पत्रकार परिषद घेणार असल्याचं वृत्त आहे. या पत्रकार परिषदेतच श्याम रजक हे राजदमध्ये प्रवेश करणार असल्याचं बोललं जात आहे. मागील काही दिवसांपासून रजक हे राजद नेत्यांच्या संपर्कात होते.

Copy